ابونا بولس جورج بدون عنوان 19 10 2016 الرد على مجموعة أسئلة — ~

 

 

fr-pouls-gorge

 

يرد ابونا بولس جورج على مجموعة اسئلة

س/ اذا ذهبت ابنتى الى الكافيه مع اصحابها اولاد والبنات من العمل هل ده يصح؟

يرد ابونا بولس

 دى بقيت ظاهرة منتشرة ولكن مازال احنا اسلوبنا ككنيسة متحفظ لازم نعرف هما بيخرجوا مع مين ولما بيكون مجموعة الاصدقاء تبع الكنيسة وتحت اشراف روحى وعارفين الخدام بنبقى عارفين حدود الخروجة لكن اصدقاء الشغل ده مجتمع مفتوح منعرفش هما بيتكلموا عن ايه ومش عارفين القعدة ترضى صلاح الله ولا لا والمشكلة هنا ان البيت لم يضع حدود من الاول فى التربية لان لازم يكون فى توعية لبنتى لما تكون داخلة جامعة ونقولها ايه الحاجات اللى بتسمح بيها الاسرة فالبنت تعرف حدودها وتعرف تقول لا لما حد يطلب منها حاجة بره البيت

س/ انا عندى 3 اولاد الدخل ضعيف والمصاريف جامدة . ابنى دخلناه جامعة خاصة والمصاريف 15 الف فى السنة وابنى التانى هيدخل ثانوية عامة ودروسه تكلفنى 1500 فى الشهر ومرتبى انا وزوجتى 2500 وبعنا الارض اللى نملكهم عشان ندفع مصاريف الكلية فهل ممكن الكنيسة تساعدنا؟

يرد ابونا بولس جورج

 اسف لو الاجابة هتضايقك فى الكنيسة مش هيقدروا يساعدوك اوى لان الكنيسة فى الظروف اللى بتمر بيها مصر عندها التزمات كتير الادوية تمنها ارتفع والناس الى من غير شغل كترت فالكنيسة هتساعد ايه ولا ايه واللى عندنا مش كتير والمبالغ اللى بتقوليها كتير الكنيسة ممكن تعمل نوع من انواع الاعانة ولكن متقدرش تعمل اعالة . الى بتطلبه اكتر من الكنيسة تقدمه وبعدين ترجع تزعل وتقول الكنيسة معملتليش حاجة قرارك مكنش قرار محسوب ربنا يدبر الاحوال ممكن تشتغل شغل اضافى او ابنك اللى فى جامعة ممكن يشتغل فى الصيف ومنها يحس بتحمل المسئولية نسبيا

س/ اذا ظلمنى اخويا ووضع يده على ارض ميراث من ابى وقام بالبناء عليها مستغل ان انا واخويا التانى لا نملك فلوس مثله ولم يستجيب لوسطة اعممى ان يكون لينا نصيب فى الارض او حق ان احنا نبنى معاه ولم يستجيب لابونا من الكنيسة فهل من حقى ارفع عليه قضية وادخله السجن؟

يجيب ابونا بولس

الاول نستوفى كل اعمال المحبة ونكلمه مرة واتنين وندخل ناس وممكن نقول لاسقف الايبارشية يعمل لجنة ويشوف التفاصيل . وحكاية انك ترفع قاضية فى حالة انه ماستجابش ممكن ابونا الاسقف يديلك حل بكدا لكن تدخليه السجن لا مش ممكن اوافقك مهما كان ظالمك مش ممكن ندخله السجن وارجوك صليله

س/ انا شاب كسول وضعيف الارادة فماذا افعل؟

 ابدء بحاجات تحرك نفسك قول هقف قدام ربنا دقيقة او دقيقتين او قول ابنا اللذى وصلى هتبقى عملت حاجة وكل يوم تقف قدام ربنا وتقول حاجة والتدريب التانى تربط حاجة بحاجة مثل مش هذاكر غير لما اقف قدام ربنا واقراء اصحاح من الانجيل وقبل كل حاجة تعمل كدا

س/ اذا كان الخجل يمنعنى بالاعتراف بخطايا عمرها اكتر من 40 سنة وانا طلعت على المعاش وخايف من الموت ومش عارف اعمل ايه؟

يرد ابونا بولس

ممكن تكون فى خطايا مخزية للانسان وقع فيها لكن الحل اننا نعترف بها و نقدم التوبة والندم لربنا وفى زيارة لاى دير روح لاى راهب كاهن ميعرفكش واعترفله بيها ويصليلك

س/ لماذا نقراء العهد القديم ومعظمه صعب وغير مفهوم انا بكتفى بالعهد الجديد؟

يجيب ابونا بولس

المسيح قال "ما جئت لأنقض بل لأكمل" وبالتالى العهد القديم جزء من الكتاب المقدس بنعرف من خلاله فكر وتدبير الله ورجاله ودلوقتى يوجد كتب تفسير ليه وتوجد نبوات للعهد الجديد فى العهد القديم

س/ اذا كنت زعلان من اب اعترافى ممكن اعتبه؟

يجيب ابونا بولس

ممكن تعاتب اى حد بس متكنش لسة غضبان وانت رايح تعاتبه وفى شرطين للعتاب هما المحبة والاتضاع لازم تكون بتحبه وتعاتبه باتضاع مش انك عايز تحرجه

س/ زوجتى انسانة لا تطيع فما حكم الكنيسة عليها؟

يرد ابونا بولس

احنا لازم نعرف هى مش بتطيع فى ايه وممكن يكون اسلوبك انت صعب وفى ايه قالها المسيح " كما تريدون أن يفعل الناس بكم افعلوا أنتم أيضاً هكذا بهم" احنا مش ضد الطاعة . الزوجة لازم تطيع ولكن انت يمكن بتطلب منها حاجات تكون ضد ربنا وممكن تاخدها وتروح لاب اعترافها وتقوله على اللى مزعلك لان الموضوع محتاج ارشاد

س/ دعانى احد اصدقائى لحضور التسبحة فى الكنيسة وقال انها مفرحة ولكن بعد التسبحة كل الى حسيته الحزن والكئابة لانى لم افهم شئ منها ونصها كان بالقبطى

يقول ابونا بولس

توجد تسجيلات للتسبحة لفريف ابى فام بالعربى ابدء بيها وياريت يكون معاك الابصلمودية وتشوف بعنيك اللى بيقولوا وهتبدء تحفظ وتفرح قلبك وتشتاق للتسبحة

س/ ما معنى من اخطأ خطيئة واحدة سار خطأ فى الكل هل من الممكن ان الانسان ميخطأش خطية واحدة؟

يجيب ابونا بولس

المقصود ان مينفعش الانسان يبطل خطية واحدة ويقول انا بقيت كويس لان كدا بيضلل نفسه فلازم نجاهد بكل قوتنا ضد الخطايا كلها ونجاهد بكل قوتنا فى كل الفضائل

(Visited 194 times, 1 visits today)

أترك تعليقك

شاهد أيضاً

LEAVE YOUR COMMENT

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.